देशभक्ति / सुविचार / प्रेम / प्रेरक / माँ / स्त्री / जीवन

कवन सुगवा मार देलस ठोरवा (लोकगीत)

कवन सुगवा मार देलस ठोरवा,
ए रामा गजब भइले ना।
कि आहो रामा सुगवा जुठार देलस केरवा,
ए रामा गजब भइले ना।

कतना जतनवा से भोगवा बनइनी,
ए रामा गजब भइले ना।
कि आहो रामा सुगवा जुठार देलस भोगवा,
ए रामा गजब भइले ना।

छोटका बबुआ जे बहंगी उठइले,
ए रामा गजब भइले ना।
कि आहो रामा सुगवा जुठार देलस सेउवा,
ए रामा गजब भइले ना।

सुगवा जे उड़ले आकाशवा
सूरुज देव पासवा,
ए रामा गजब भइले ना।
कि आहो रामा सूरुज देव खींचले परनवा
हो गिर गइले सुगना,
ए रामा गजब भइले ना।

कि सुगनी जे करेली विलपवा
सूरुज देव दीही ना आशीषवा,
ए रामा गजब भइले ना।
कि आहो रामा दिहले आशीष
सुग्गा उड़ले आकाशवा,
ए रामा गजब भइले ना।

पावन छठी मैया के व्रतवा
करे सब लोगवा,
ए रामा गजब होइहे ना।
कि छठी मैया दीहे आशीषवा
हो भरिहे अँचरवा,
ए रामा गजब होइहे ना।


रचनाकार : आशीष कुमार
लेखन तिथि : नवम्बर, 2021
            

रचनाएँ खोजें

रचनाएँ खोजने के लिए नीचे दी गई बॉक्स में हिन्दी में लिखें और "खोजें" बटन पर क्लिक करें